Divisional Secretariat - Negombo

මීගමුව ප්‍රාදේශීය ලේකම් රසිකා මල්ලවආරච්චි මහත්මියගේ මග පෙන්වීම යටතේ මීගමුව ප්‍රාදේශීය ලේකම් කොට්ඨාසයේ ජනතාවගේ එදිනෙදා රාජ්‍ය සේවා අවශ්‍යතා රැසක් එකම වහලක් යටදී ඉතා කඩිනමින් සහ කාර්යක්ෂමව ඉටුකර දීම වෙනුවෙන් මීගමුව ප්‍රාදේශීය ලේකම් කාර්යාලය මගින් සංවිධානය කරන ලද "රාජ්‍ය සේවය ගමට" ජංගම සේවා වැඩසටහන් මාලාවේ 09 වන අදියර ක්‍රීඩා නියෝජ්‍ය අමාත්‍ය හා මීගමුව සම්බන්ධීකරණ කමිටු සභාපති සුගත් තිලකරත්න මහතාගේ ප්‍රධානත්වයෙන් 2026 අගෝස්තු මස 28 වන දින උදෑසන 9.00 සිට සවස 2.00 දක්වා දුන්ගල්පිටිය සේවා පියසේදී සාර්ථක අයුරින් පැවැත්විනි.  මෙම අවස්ථාව සඳහා නාගරික මන්ත්‍රීවරුන් වන නලින් හෙට්ටිආරච්චි, ජූඩ් ඉෂාර යන මහත්වරුන්, මීගමුව ප්‍රාදේශීය ලේකම් රසිකා මල්ලවාරච්චි මහත්මිය ඇතුළු රාජ්‍ය නිලධාරීන් සහ ප්‍රදේශයේ ප්‍රජා සංවර්ධන සභා සභාපතිවරුන් රැසක් සහභාගි විය.

මෙම ජංගම සේවයේදී 163 - තලාහේන , 163 B - දුන්ගල්පිටිය, 163A - කැපුන්ගොඩ , 163C- සෙත්තප්පාඩුව යන   ග්‍රාම නිලධාරි වසම්වල ජනතාවට තමන්ගේ අවශ්‍යතා රැසක්   උප්පැන්න, මරණ, විවාහ සහතික නිකුත් කිරීම , ජාතික හැඳුනුම්පත් සම්බන්ධ රාජකාරි , වැඩිහිටි හැඳුනුම්පත් සැකසීම , රජයේ ඉඩම් සම්බන්ධ ගැටලු නිරාකරණය කිරීම , ව්‍යාපාර ලියාපදිංචි කටයුතු , ආපදා සහන සේවා , ළමා, කාන්තා කටයුතු හා උපදේශන සේවා , විදේශ සේවා සහ රැකියා ගත කිරීම් , අස්වැසුම සේවා සහ සමාජ සේවා ගැටළු , විශ්‍රාම වැටුප් ,ව්‍යාපාර ණය හා උපදේශන සේවා ආදී රාජ්‍ය සේවාවන් ජනතාවගේ දොරකඩටම රැගෙන යමින්, ඔවුන්ගේ ගැටලු රැසකට කඩිනම් විසඳුම් ලබාදීමට හැකිවීය. එදින විශාල ජනතාවක් මෙම සේවාවන් ලබාගැනීම සඳහා එක්විය.

මුල් ළමාවියේ දරුවන්ගේ රැකවරණය හා සමස්ත සංවර්ධනය ශක්තිමත් කිරීම සඳහා දෙමාපියන්ගේ දැනුම, ආකල්ප, කුසලතා වර්ධනය කිරීම අත්‍යාවශ්‍ය වේ. විශේෂයෙන්ම දරුවන්ගේ ඉගෙනුම් හා සංවර්ධන ක්‍රියාවලිය සඳහා දෙමාපියන්ගේ සක්‍රීය සහභාගීත්වය සහ සහාය ලබා දීම අත්‍යවශ්‍ය වේ. මේ පිළිබඳව මුල් ළමාවිය දරුවන් සිටින මව්වරුන් දැනුවත් කිරීමේ වැඩසටහනක් ප්‍රාදේශීය ලේකම් තුමියගේ උපදෙස් මත මීගමුව පෝරුතොට දී 2026 අගෝස්තු මස 25 දින පවත්වන ලදී.

ඉස්ලාම් ධර්මයේ, ප්‍රාරම්භකයා සහ අවසන් ධර්මදූතයා ලෙස සැලකෙන ගෞරවනීය මහම්මද් නබි නායකතුමන්ගේ ජන්ම දිනය සමරන 42 වන මිලාද් උන් නබි මහෝත්සවය , සහජීවනය, සහෝදරත්වය සහ එකමුතුකම යන උදාර තේමාව පෙරදැරි කරගනිමින් මහත් හරසරින් සහ අභිමානයෙන් යුතුව මෙවර මෙම ජාතික මහෝත්සවය   2026 අගෝස්තු මස 26 වන දින සවස මීගමුව, පෙරියමුල්ල, අල් හිලාල් විද්‍යාල පරිශ්‍රයේදී පවත්වන ලදි.

ගම්පහ දිස්ත්‍රික්කයට වසර 28කට පසුව මෙවන් ජාතික මහෝත්සවයක් පැවැත්වීමේ අවස්ථාව හිමිවීමත්, විශේෂයෙන් පාස්කු ප්‍රහාරයෙන් පසුව ප්‍රදේශයේ සාමය, සහජීවනය සහ සංහිඳියාව තහවුරු කිරීමේ අරමුණින් මීගමුව පුරවරය මේ සඳහා තෝරා ගැනීමත් මෙවර උත්සවයේ කැපී පෙනෙන විශේෂත්වය විය. ගරු ජනාධිපති අනුර කුමර දිසානායක මහතාගේ ප්‍රධානත්වයෙන් පැවති මෙම අති උත්කර්ෂවත් ජාතික මහෝත්සවය සඳහා සියලු ආගම් නියෝජනය කරමින් ගරු ස්වාමීන් වහන්සේලා සහ ගරු පූජකතුමන්ලා,  බුද්ධ ශාසන, ආගමික හා සංස්කෘතික අමාත්‍ය මහාචාර්ය හිනිදුම සුනිල් සෙනෙවි, නියෝජ්‍ය අමාත්‍ය මුනීර් මුලාෆ්ෆර්, විද්‍යා හා තාක්ෂණ අමාත්‍ය මහාචාර්ය ක්‍රිෂාන්තා අබේසිංහ, කම්කරු අමාත්‍ය සහ මුදල් හා ක්‍රමසම්පාදන නියෝජ්‍ය අමාත්‍ය ආචාර්ය අනිල් ජයන්ත ප්‍රනාන්දු, නියෝජ්‍ය කතානායක වෛද්‍ය මොහොමඩ් රිස්වි සාලී, කම්කරු නියෝජ්‍ය අමාත්‍ය මහින්ද ජයසිංහ, ක්‍රීඩා නියෝජ්‍ය අමාත්‍ය සුගත් තිලකරත්න , බස්නාහිර පළාත් ආණ්ඩුකාර හනීෆ් යුසූෆ් සහ ගම්පහ දිස්ත්‍රික් පාර්ලිමේන්තු මන්ත්‍රී චම්පික හෙට්ටිආරච්චි යන මහත්වරුන් ද ඇතුළු ප්‍රාදේශීය දේශපාලන අධිකාරිය, ගම්පහ දිස්ත්‍රික්  ලේකම් ලලින්ද ගමගේ, මීගමුව ප්‍රාදේශීය ලේකම් රසිකා මල්ලවආරච්චි යන මහත්ම මහත්මීන් ඇතුළු රාජ්‍ය නිලධාරීන් හා  මහජනතාව මෙම ජාතික මහෝත්සවයට සහභාගී වූහ. 

වසර ගණනාවක සිට මුස්ලිම් පල්ලිවල ආගමික කටයුතු කරමින් තම ජීවිතයේ වැඩි කාලයක් කැපකල මව්ලවිවරුන් සමාජයට සිදුකල සේවාව මෙම උත්සවයේදී අගැයීමට ලක්කල අතර ජාතික මීලාද්-උන් නබි සැමරුමට සමගාමීව සංවිධානය කර තිබූ පාසල් තරගවල  ජයග්‍රාහී සිසු සිසුවියන්ට ත්‍යාග ප්‍රදානය කිරීමද ජනාධිපතිවරයා අතින් සිදු කෙරුණි . 2026 වසරේ  ජාතික මීලාද්-උන් නබි රාජ්‍ය මහෝත්සවය නිමිත්තෙන් නිකුත් කළ සමරු මුද්දරය සහ මුල්දින කවරය මෙන්ම ගම්පහ දිස්ත්‍රික්කයේ මුස්ලිම්වරුන්ගේ ඉතිහාසය පිළිබඳ ලියැවුණු ග්‍රන්ථයක් සහ  ජාතික මීලාද්-උන් නබි සැමරුම - 2026 සමරු කලාපයද මෙහිදී ජනාධිපතිවරයා වෙත පිළිගන්වනු ලැබීය . මෙම ජාතික උත්සවය බුද්ධශාසන , ආගමික හා සංස්කෘතික කටයුතු අමාත්‍යාංශය සහ මුස්ලිම් ආගමික හා සංස්කෘතික කටයුතු දෙපාර්තමේන්තුව එක්ව සංවිධානය කරන ලදි.

ගම්පහ දිස්ත්‍රික්කය පුරා කලාත්මක ප්‍රබෝධයක් ඇති කරමින් ක්‍රියාත්මක වන "සියනෑ නිකිනි සංස්කෘතික පුනරුදය" වැඩසටහන් මාලාවේ මීගමුව අදියර, 2026 අගෝස්තු 19 වන දින පෙ.ව. 9.30 සිට මීගමුව ප්‍රාදේශීය ලේකම් කාර්යාලීය ශ්‍රවණාගාරයේ දී අතිසාර්ථක ලෙස පැවැත්විණි. ගම්පහ සංස්කෘතික අභිමානය තව තවත් ඔප්නැංවූ මෙම වැඩසටහන, මීගමුව ප්‍රාදේශීය ලේකම් රසිකා මල්ලවආරච්චි මහත්මියගේ උපදෙස් හා මගපෙන්වීම යටතේ මීගමුව ප්‍රාදේශීය ලේකම් කාර්යාලීය සංස්කෘතික අංශය මගින් ඉතා අලංකාර ලෙස සංවිධානය කර තිබුණි. 

ප්‍රවීණ නාට්‍යවේදී රන්දික විමලසූරිය මහතා විසින් මෙහෙයවන ලද සිනමා රසවින්දන වැඩසටහන සහ කෙටි සිනමා දැක්ම, සභාවේ සිටි සියලු දෙනාගේ හදවත්  ප්‍රමෝදයකින් පුරවාලීමට සමත් වූ අතර,  එකී සොඳුරු කලාත්මක වැඩසටහන වෙනුවෙන් ගරු ක්‍රීඩා නියෝජ්‍ය අමාත්‍ය සහ මීගමුව සම්බන්ධීකරණ කමිටු සභාපති සුගත් තිලකරත්න මැතිතුමා ,  ගරු ගම්පහ දිස්ත්‍රික් පාර්ලිමේන්තු මන්ත්‍රී සහ කලා හා සංස්කෘතික අනුකමිටු අධීක්ෂණ මන්ත්‍රී රුවන් මාපලගම මැතිතුමන් ඇතුළු සම්භාවනීය අමුත්තන් රැසක් හා වැඩිහිටි බල මණ්ඩලය, කාන්තා බල මණ්ඩලය, සංස්කෘතික බල මණ්ඩලය, පෙර පැසැල් ගුරු සංගමය හා රාජ්‍ය නිලධාරින් විශාල පිරිසක් සහභාගි  විිය.

,